Nuuk International Film Festival 2026
Siorna Nuuk International Film Festival 2025-mi oqallinnerni ilaatigut Kalaallit Nunaanni Filminstituttissaq eqqartorneqarpoq. Ukioq mannalu nuannaarutigeqisatsinnik peqataaffigalugulu suleqataaffigaarput.
NIFF ukiut qulinngortorsiornera persuarsiutigalugu Kalaallit Nunaanni Filminstituttimiit pilluaqqusilluta suliaq kusanartumik naammassineqarnera ersersikkusupparput. Pingaartumillu aaqqissuisut nersualaarusuppagut ukiuni taakkunani nunatsinni filmi uummateqarfigalugu siuarsaaqataasimanerannut.
Malunnaatilimmik nunatsinni filmip ineriartuaarnera ersarippoq. Piffissanngormallu Kalaallit Nunaanni Filminstituttimiit aningaasaleeqataaffigalugulu suleqataaffigineqalerpoq. Filmfestivaleqartarnermi filmiliortartunut suleqataasorpassuarnullu pingaarutilerujussuuvoq.
Filmfestivalit suleqatissarsiorfiusarput, periarfissanik nutaanik ujaarlerfiit, oqalliffiusarput, filmerpassuarnik isiginnaartoqarsinnaalluni, aningaasaliisussarfiusarput, avataaniit tikittut amerlasarput, ilisimatusarnikkut aaqqissuinerit, filmiliassanik saqqummiinerit, minnerunngitsumillu takuteqqaarneqartussat saqqummerfigisarlugu.
Ukioq mannalu kalaallit filmiliaat suleqataaffigisaallu isiginnaartinneqartut tassaapput:
· Erfalasorput
· Tartupaluk (Virtual Reality)
· Sila
· Tamatta Ataqatigiippugut
· Arctic Sports & Dene Games
· Orsugiak
· City in the Fox
· Always Moving
· North of the Storm
· Nunarpununa
· Malugiviuk?
· Det var juni
· The Quiet Invasion
· Nuanneq Niperput
· Banquise
Kalaallit filmiliaannik soqutigisaqaraanni, nunarpullu filmip silarsuaani ineriartortoq misigerusukkaanni, uagullu kalaallit nunatta avataaniit paasineqarnissarput uummateqarfigigaanni innersuukkusunnarpoq aappaagu Nuuk International Film Festival malinnaaffigiartoqqullugu.
Naggasiutigalugu NIFF-imi aaqqissuisunut, sulisunut, suleqataasunut, tikerartunut isiginnaariartorpassuarnullu qujarusuppugut, aappaagumullu qilanaalereerluta.
Inunnguaq Petrussen